مذيعه لامعه مع ضيف لامع من الصينى

التت التت التت
تاتو دخلت على النت
حبايبى واصحابى ده حلقه من حلقاتى
اللى كنت بعملها زمان ايام الشباب بقى
خلاص هنخد زمنا وزمن غيرنا وتم بعد التصحيح والتعديل عليها
كح كح كح كح
ماعلينا خلينا فى المهم يااطفالى قصدى يااصدقائى

احم احم احم كوبايه ينسون يابنى الله يكرمك
نبدا كلامنا بقى
انا قلت نفسى اعمل حوار صحفى ومميز بما انى مذيعه
لامعه ومحصلتش ولا هحصل ابدا
ويكون الحوار مع راجل محترم عايش مشاكل الجيل
وبيتكلم بالنيابه عنهم وقلت لازم يبقى حوار محصلش مع
ضيف بردو محصلش

واوعدكم انى اوصل صوتكم من خلال الضيف المحترم
للساده المسئولين عبر برنامجى الرائع المميز الجبار اللى يهوس
اه جبار ويهوس حد عنده مانع والا ايه
الحوار هيكون مع شاب جميل كده ومسبسب وضارب
شعره جل فى الخلاط وعليه كوبيتين مياه
مع علبه كمبوت وهنيلك يافاعل الخير والثوب

طبعا اخونا الضيف عامل دماغ قبل البرنامج وضارب سجارتين
لب سوبر و2 سودانى و3 حمص وفشار
احم احم نبدا الحوار

تاتو/ السلام عليكم ورحمه الله وبركاته
الضيف / وعليكم السلام مين برنامج البيت بيتك

تاتو / ايه يااستاذ فوق كده وركز معانا بيت بيتك ايه وغيط غيطك ايه بس
الضيف / اااااااااااه اكيد برنامج على الناصيه اللى بيجى فى الراديو

تاتو / ناصيه ايه ياعم وشارع ايه بس من الاخر انا مذيعه وجايه اوصل صوتك للمسئولين
الضيف / توصلى صوتى ليه انتى مايك والا مكبر صوت

تاتو / شكلك كده هتبوظ الحوار والبرنامج كله اروح اشوف حد غيرك
الضيف / غيرى مين يااستاذه والله هطلع الموس واى حد هيقرب والا يجى بدلى هقطعه

تاتو / خلاص ياعم نبدا الحوار وامرنا لله ايه رايك فى العصر اللى بنسميه العولمه
الضيف / فعلا يااستاذه احنا فى عصر العولمه كان زمان نشوف اخرنا نشوف دينا
وفيفى عبده دلوقتى ماشاء الله ظهر شويه عوالم بس ايه اوعى

تاتو / عوالم ايه بس وفيفى ايه ودينا مين يابنى فوق انا اقصد النت وكده
الضيف / ااااااااه قصدك النت والمواقع والتشيش وكده

تاتو / تشيش ايه ياحضره احنا فى قهوه والا ايه تقصد التشيت
الضيف / اه التشييت طب اقولك انا امبارح كنت بشيت واتعرفت على بنت
انما ايه اوعى وشك

تاتو / الناس بره فى الدول المتقدمه بتستخدم النت فى الدراسه وعمل الابحاث
وانت تقولى تشييت وبنات ياعم انت دراستك ايه
الضيف / انا بتعلم هع هع وكمان هع هع تعليم ايه ياحاجه انا مش تعليم

تاتو / اومال وش ايه
الضيف / وش دوكو هههههههههه

تاتو / طب ايه رايك فى تعديل الدستور اللى كان من فتره كده فاكره والا لا
الضيف / اه طبعا فاكره اومال ايه ايوه تمام كان لازم يتعدل لانه بجد كان محتاج
شويه دهان وكده الرطوبه بقى وبتاع

تاتو / يابنى ارحمنى الدستور ده يعنى سياسيه البلد تقولى رطوبه
الضيف / ااه اسف انا اصلى ماليش فى السياسه انا زملكاوى وبس

تاتو / طب ايه فى اللى بيحصل دلوقتى فى الجامعات بين الولاد والبنات وظاهره الجواز العرفى
الضيف / عرف ايه يااستاذه احنا مالنا ومال الفراخ انتى ناسيه انفلونزا الطيور والا ايه

تاتو / طب الحمد لله انك عارف حاجه اهو وعارف انفلونزا الطيور ايه رايك فيها بقى
الضيف / يااستاذه بلاش وجع دماغ ماحنا بنتعب وبيجلنا انفلونزا وعايشين اهو هنشيل
هم الفراخ كمان

تاتو / طب اكلمك فى ايه طيب يااستاذ
الضيف / كلمنى فى المزاج والبانجو مش بتاعى والله برىء يابيه
وهيييييييييييه وشعبولا حبيب الملايين

تاتو / بانجو ايه ومزاج ايه وشعبولا ايه بس بس اسكت خلاص ننهى الموضوع
داحنا كده هندخل فى تابيده 25 سنه

اعزائى القراء والمشاهدين والمستمعين هذا هو حال معظم شباب جيلنا
وانا اعلن من هنا ومن منصبى هذا اننى قدمت استقاله رسميه سوف تعتمد
من مجلس الامم بانى مستقيله رسميا من منصب مذيعه وللابد
حد يجبلى شاى واسبرينه و5 سندوتشات بورجر وسوسيس
بمناسبه الاستقاله ياجدعان
وربع جنيه سلف والنبى علشان اروح بيتنا بقى
مين هيسلفنى هناااااااااااااااااااا[center]